ଏଣିକି ସୀମା ଜଗିବେ କୁମ୍ଭୀର ଓ ସାପ

ଭାରତ ଓ ବାଂଲାଦେଶ ମଧ୍ୟରେ ସୀମା ବିଶ୍ୱର ସବୁଠାରୁ ଲମ୍ବା ଏବଂ ଜଟିଳ ସୀମା ମଧ୍ୟରୁ ଅନ୍ୟତମ । ଏହି ୪,୦୯୬ କିଲୋମିଟର ଲମ୍ବା ସୀମାରେ ଚୋରା ଚାଲାଣ ଏବଂ ଅନୁପ୍ରବେଶକୁ ରୋକିବା ସର୍ବଦା ଏକ ପ୍ରମୁଖ ଚ୍ୟାଲେଞ୍ଜ ହୋଇଆସିଛି ।

ବର୍ତମାନ ଏହି ଚ୍ୟାଲେଞ୍ଜର ମୁକାବିଲା କରିବା ପାଇଁ ସୀମା ସୁରକ୍ଷାବାହିନୀ (ବିଏସଏଫ) ଏକ ରଣନୀତି ବିଚାର କରୁଛି । ସୂଚନାନୁଯାୟୀ ଦୁର୍ଗମ ଅଂଚଳରେ ଅନୁପ୍ରବେଶକାରୀଙ୍କୁ ବିରୋଧ କରିବା ପେଇଁ ସାପ ଏବଂ କୁମ୍ଭୀର ଭଳି ସରୀସୃପଙ୍କୁ ପ୍ରାକୃତିକ ଅସ୍ତ୍ର ଭାବେ ବ୍ୟବହାର କରିବାର ସମ୍ଭାବନା ବର୍ତମାନ ଅନୁସନ୍ଧାନ କରାଯାଉଛି ।

ଭାରତ-ବାଂଲାଦେଶ ସୀମାର ପ୍ରାୟ ୧୭୫କିଲୋମିଟର ନଦୀ, ଝରଣା ଏବଂ ଜଳାଭୂମିରେ ଆଚ୍ଛାଦିତ । ଭୌଗୋଳିକ ଭୂ-ଭୂମି ଏପରି ଯେ ଏଠାରେ ପାରମ୍ପରିକ କଂଟା ତାର ବାଡ଼ ସ୍ଥାପନ କରିବା ପ୍ରାୟତଃ ଅସମ୍ଭବ ।

ବର୍ଷା ଋତୁରେ ଏହି ଅଂଚଳଗୁଡ଼ିକ ପ୍ରାୟତଃ ବନ୍ୟାର ସମ୍ମୁଖୀନ ହୋଇଥାଏ । ଯାହାଦ୍ୱାରା ସୁରକ୍ଷା ପରିଧିକୁ ଆହୁରି ଜଟିଳ କରିଥାଏ ।

ସଂସଦୀ ସ୍ଥାୟୀ କମିଟିର ଏକ ସାଂପ୍ରତିକ ରିପୋର୍ଟ ଅନୁଯାୟୀ ମୋଟ ସୀମାର ପ୍ରାୟ ୩୭୧ କିଲୋମିଟର ଅଂଚଳ ଏବେ ମଧ୍ୟ ବାଡ଼ମୁକ୍ତ ରହିଛି । ଏହି ବ୍ୟବଧାନର ସୁଯୋଗ ନେଇ ଚୋରା ଚାଲାଣକାରୀ ଏବଂ ଅନୁପ୍ରବେଶକାରୀମାନେ ଭାରତୀୟ ଅଂଚଳରେ ପ୍ରବେଶ କରିଥାଆନ୍ତି ।

ରିପୋର୍ଟ ଅନୁଯାୟୀ ଏହି ସମସ୍ୟାର ସମାଧାନ ଖୋଜିବା ପାଇଁ ଏବଂ ଗୃହ ମନ୍ତ୍ରଣାଳୟର ପରାମର୍ଶ ଅନୁସରଣ କରି ବିଏସଏଫ ଏବେ ପ୍ରକୃତି ଆଡ଼କୁ ମୁହାଁଇଥିବା ପରିଲକ୍ଷିତ ହୋଇଛି । ମାର୍ଚ ୨୬ରେ ବିଏସଏଫ ମୁଖ୍ୟାଳୟଦ୍ୱାରା ଜାରି ଏକ ଆଭ୍ୟନ୍ତରୀଣ ବାର୍ତା ଅନୁଯାୟୀ ନଦୀ ଏବଂ ଜଳାଭୂମି ଅଂଚଳରେ ସାପ ଓ କୁମ୍ଭୀର ନିୟୋଜିତ କରିବାର ସମ୍ଭାବ୍ୟତା ଅଧ୍ୟାନ କରିବାକୁ କ୍ଷେତ୍ର ୟୁନିଟଗୁଡ଼ିକୁ ନିର୍ଦେଶ ଦିଆଯାଇଛି । ଏହି ଯୋଜନା ପଛରେ ଥିବା ମନସ୍ତାତ୍ୱିକ ଯୁକ୍ତି ହେଉଛି ଭୟ ସୃଷ୍ଟି କରିବା ।

ଯଦି ଜଣେ ଚୋରା ଚାଲାଣକାରୀ ଜାଣନ୍ତି ଯେ ସେ ଯେଉଁ ନଦୀ କିମ୍ବା ଜଳାଭୂମି ପାରି ହେବାକୁ ଚାହେଁ, ସେଥିରେ ବିଷାକ୍ତ ସାପ କିମ୍ବା କୁମ୍ଭୀର ରହିଛି, ତେବେ ସେ ପଦକ୍ଷେପ ନେବା ପୂର୍ବରୁ ଚିନ୍ତା କରିବ । ଯାହାଦ୍ୱାରା ସେ ସେ ଭୟଭୀତ ହେବା ସହ ତାର କାର୍ଯ୍ୟକ୍ରମରୁ ଦୂରେଇ ରହିବ ।