ସାର୍ବଜନୀନ ସ୍ଥାନରୁ ବୁଲା କୁକୁରଙ୍କୁ ହଟାଇବାକୁ ନିର୍ଦେଶ

ଦେଶର ପ୍ରାୟ ସର୍ବତ୍ର ବୁଲା କୁକୁରଙ୍କ ସଂଖ୍ୟା ବୃଦ୍ଧି ପାଇଛି । ଦେଶରେ ଏହି ବଢ଼ୁଥିବା ବୁଲା କୁକୁରଙ୍କ କାମୁଡ଼ା ଭୟକୁ ନେଇ ସୁପ୍ରିମ କୋର୍ଟ ଏକ ବଡ଼ ରାୟ ଦେଇଛନ୍ତି ।

ସାର୍ବଜନୀନ ସ୍ଥାନରୁ ବୁଲା କୁକୁରଙ୍କୁ ହଟାଇବାକୁ ସୁପ୍ରିମ କୋର୍ଟଙ୍କ ନିର୍ଦେଶ ହୋଇଛି । ଡାକ୍ତରଖାନା, ବସ ଷ୍ଟାଣ୍ଡ, ବିଦ୍ୟାଳୟ, ରେଳ ଷ୍ଟେସନ ଭଳି ସର୍ବସାଧାରଣ ସ୍ଥାନରୁ ଅଣାଯାଇଥିବା ବୁଲା କୁକୁରଙ୍କୁ ଟିକାକରଣ କିମ୍ବା ବନ୍ଧ୍ୟାକରଣ ପରେ ସେହି ସ୍ଥାନରେ ପୁନର୍ବାର ନ ଛାଡ଼ିବା ପାଇଁ ପୂର୍ବରୁ ଦେଇଥିବା ନିର୍ଦେଶକୁ ପ୍ରତ୍ୟାହାର କରିବାକୁ ସର୍ବୋଚ ନ୍ୟାୟାଳୟ ମନା କରି ଦେଇଛନ୍ତି ।

୨୦୨୫ର ରାୟକୁ ବଳବତର ରଖିଲେ ସୁପ୍ରିମ କୋର୍ଟ । ଜନସୁରକ୍ଷାକୁ ପ୍ରାଥମିକତା ଦେଇ ସର୍ବୋଚ୍ଚ ନ୍ୟାୟାଳୟଙ୍କ ବଡ଼ ରାୟ ପ୍ରଦାନ କରିଛନ୍ତି । ବିଚାରପତି ବିକ୍ରମ ନାଥ, ବିଚାରପତି ସନ୍ଦୀପ ମେହେଟ୍ଟା ଏବଂ ବିଚାରପତି ଏନ ଭି ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ ଗତବର୍ଷ ନଭେମ୍ବରରେ କୋର୍ଟଙ୍କଦ୍ୱାରା ଜାରି କରାଯାଇଥିବା ନିର୍ଦେଶରେ ପରିବର୍ତନ ଆଣିବାକୁ ଦାବି କରୁଥିବା ଏକାଧିକ ଆବେଦନକୁ ଖାରଜ କରି ଦେଇଛନ୍ତି । ଏହି ରାୟର ଅର୍ଥ ହେଉଛି କର୍ତୃପକ୍ଷଙ୍କଦ୍ୱାରା ସର୍ବସାଧାରଣ ସ୍ଥାନରୁ ଉଦ୍ଧାର କରାଯାଇଥିବା ବୁଲା କୁକୁରମାନଙ୍କୁ ପୁଣିଥରେ ସେହି ସ୍ଥାନରେ ଛାଡ଼ିବା ପରିବର୍ତେ ଆଶ୍ରୟସ୍ଥଳୀରେ ରଖାଯିବ ।

ଏହା ସହିତ ଆନିମଲ ୱେଲଫେୟାର ବୋର୍ଡ ଅଫ୍ ଇଣ୍ଡିଆଦ୍ୱାରା ଜାରି କରାଯାଇଥିବା ଷ୍ଟାଣ୍ଡାର୍ଡ ଅପରେଟିଂ ପ୍ରୋସିସିଓର (ଏସଓପି)କୁ ଚ୍ୟାଲେଞ୍ଜ କରୁଥିବା ଆବେଦନଗୁଡ଼ିକୁ ମଧ୍ୟ କୋର୍ଟ ପ୍ରତ୍ୟାଖ୍ୟାନ କରିଛନ୍ତି । ମଙ୍ଗଳବାର ପ୍ରଦାନ କରଯାଇଥିବା ରାୟରେ ଖଣ୍ଡପୀଠ ଛୋଟ ପିଲା ଏବଂ ବୟସ୍କଙ୍କ ଉପରେ କୁକୁର ଆକ୍ରମଣର ଭୟାନକ ଘଟଣାଗୁଡ଼ିକ ବିଷୟରେ ଉଲ୍ଲେଖ କରିଥିଲେ ।

କୁକୁର ଆକ୍ରମଣରୁ ଲୋକଙ୍କ ଜୀବନ ରକ୍ଷା କରିବା ଦାୟିତ୍ୱ ପାଳନ କରିବାରେ ବିଫଳ ହୋଇଥିବାରୁ କୋର୍ଟ ରାଜ୍ୟ କର୍ତୃପକ୍ଷଙ୍କୁ ଦାୟୀ କରିଛନ୍ତି । କୋର୍ଟ ଦର୍ଶାଇଛନ୍ତି ଯେ ବିମାନ ବନ୍ଦର ଏବଂ ଆବାସିକ ଅଂଚଳ ସମେତ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକରେ ବୁଲା କୁକୁରଙ୍କ ପ୍ରାଦୁର୍ଭାବ ବୃଦ୍ଧି ପାଇଛି । କୋର୍ଟ ଚେତାବନୀ ଦେଇଛନ୍ତି ଯେ ଯେଉଁ ଅଧିକାରୀମାନେ ଏହି ନିର୍ଦେଶାବଳୀ କାର୍ଯ୍ୟକାରୀ କରିବାରେ ବିଫଳ ହେବେ, ସେମାନେ ଦୃଢ଼ କାର୍ଯ୍ୟାନୁଷ୍ଠାନ ଏବଂ ବିଶୃଙ୍ଖଳାଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବେ ।

ରାୟ ଶୁଣାଇ ବିଚାରପତି ସନ୍ଦୀପ ମେହେଟ୍ଟା କହିଛନ୍ତି ଯେ ‘ସମ୍ମାନର ସହ ବଂଚିବାର ଅଧିକାର ମଧ୍ୟରେ କୁକୁର କାମୁଡ଼ା ଆକ୍ରମଣର ଭୟ ବିନା ସ୍ୱାଧୀନ ଭାବେ ବଂଚିବାର ଅଧିକାର ଅନ୍ତର୍ଭୁକ୍ତ । ଏହି ମାମଲାରେ ରାଷ୍ଟ୍ର ଏକ ନିଷ୍କ୍ରିୟ ଦର୍ଶକ ହୋଇ ରହିପାରିବ ନାହିଁ । କୋର୍ଟ କୋଠର ବାସ୍ତବତାକୁ ଅଣାଦେଖା କରିପାରିବେ ନାହିଁ, ଯେଉଁଠାରେ ଛୋଟ ପିଲା, ଆନ୍ତର୍ଜାତୀୟ ପର୍ଯ୍ୟଟକ ଏବଂ ବୃଦ୍ଧ ବ୍ୟକ୍ତିମାନେ କୁକୁର କାମୁଡ଼ାର ଶିକାର ହେଉଛନ୍ତି ।’ ଗତବର୍ଷ ନମ୍ବେରରେ ରାସ୍ତାରେ ବୁଲା କୁକୁରମାନଙ୍କୁ ଖାଦ୍ୟ ଦେବା ଉପରେ ନିଷେଧାଦେଶ ଜାରି କରିଥିଲେ ଖଣ୍ଡପୀଠ, କେବଳ ନିର୍ଦ୍ଦାରିତ ସ୍ଥାନ ବ୍ୟତୀତ ଅନ୍ୟ କୌଣସି ସ୍ଥାନରେ ସେମାନଙ୍କୁ ଖାଇବାକୁ ଦିଆଯାଇପାରିବ ନାହିଁ ବୋଲି ସ୍ପଷ୍ଟ କରାଯାଇଥିଲା ।