ନୀତିକାନ୍ତି ଠିକ ଭାବେ ଚାଲିଛି : ଶ୍ରୀମନ୍ଦିର ପ୍ରଶାସନ

ରାତି ପାହିଲେ ବିଶ୍ୱ ପ୍ରସିଦ୍ଧ ଘୋଷଯାତ୍ରା ।

ବଡ଼ ଭାଇ ବଳଭଦ୍ର ଓ ଗେହ୍ଲା ଭଉଣୀ ସୁଭଦ୍ରାଙ୍କ ସହିତ ରଥାରୂଢ଼ ହେବେ କାଳିଆ ସାଆନ୍ତ ।

କୋଟି କୋଟି ଭକ୍ତଙ୍କୁ ଦେଖା ଦେଇ ତାଙ୍କ ଗୁହାରି ଶୁଣିବେ । ଶରଣ ଓ ସୁରକ୍ଷାର ଅଭୟ ପ୍ରଦାନ କରିବେ ।

ଏଥିପାଇଁ ଚଳଚଂଚଳ ହୋଇପଡ଼ିଛି ପୁରୀ ଶ୍ରୀକ୍ଷେତ୍ର ।

ବଡ଼ଦାଣ୍ଡରେ ଏବେ ଠାରୁ ଆରମ୍ଭ ହୋଇସାରିଛି ଭକ୍ତଙ୍କ ଆଗମନ ।

ଆଜ୍ଞାମାଳ ବିଜେ ପରେ ସମସ୍ତ ନୀତିକାନ୍ତି ଠିକ ଭାବେ ଚାଲିଛି ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ସୂଚନା ଦେଇଛନ୍ତି ।

ବୁଧବାର ଆଜ୍ଞାମାଳ ପାଇବା ପରେ ତିନି ରଥ ବିଜେ ନୀତି ଆରମ୍ଭ ହୋଇଛି ।

ସିଂହଦ୍ୱାର ଅଭିମୁଖେ ଯାଇଛନ୍ତି ତିନି ରଥ ।

ବୁଧବାର ସକାଳୁ ଶ୍ରୀଜୀଉମାନଙ୍କ ପରମ୍ପରାନୁଯାୟୀ ଉଭା ନୀତିକାନ୍ତି କରାଯାଇଥିଲା ।

ତେବେ ଚଳିତ ବର୍ଷ କେହି ଅନଧିକୃତ ବ୍ୟକ୍ତି ରଥ ଉପରକୁ ଚଢ଼ିପାରିବେ ନାହିଁ ବୋଲି ଶ୍ରୀମନ୍ଦିର ପ୍ରଶାସନ ନିଷ୍ପତି ନେଇଛି ।

ଏଥିସହ ରଥ ଉପରେ ମୋବାଇଲ ନେବାକୁ ମନା କରାଯାଇଛି ।

ସବୁର ଭିଡିଓଗ୍ରାଫି କରାଯିବ ।

ଯେଉଁମାନେ ଏହି ନିୟମକୁ ଉଲ୍ଲଂଘନ କରିବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଚେତାଇ ଦେଇଛନ୍ତି ।