କେଏଲ ରାହୁଲଙ୍କ ଶତକ, ସୁଦର୍ଶନ ୮୧

ପଞ୍ଜାବର ମୂଲନପୁରସ୍ଥିତ ନୁ୍ୟ ଚଣ୍ଡିଗଡ଼ ଷ୍ଟାଡିୟମରେ ଭାରତ ଓ ଆଫଗାନିସ୍ତାନ ମଧ୍ୟରେ ଟେଷ୍ଟ ମ୍ୟାଚ ଖେଳାଯାଇଛି ।

ଅଧିନାୟକ ଶୁଭମନ ଗିଲ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତି ନେଇଥିଲେ ।

ତାଙ୍କର ଏହି ନିଷ୍ପତିକୁ ସଠିକ ବୋଲି ପ୍ରମାଣିତ କରିଛନ୍ତି ଭାରତୀୟ ବ୍ୟାଟର ।

ପ୍ରଥମ ଦିନରେ ଭାରତୀୟ ବ୍ୟାଟରଙ୍କ ଦମଦାର ପ୍ରଦର୍ଶନ ଜାରି ରହିଛି ।

ଅପରାହ୍ଣର ୩ୟ ସେସନ ସୁଦ୍ଧା ଭାରତୀୟ ଦଳ ମାତ୍ର ୨ ୱିକେଟ ହରାଇ ୨୪୫ ରନ କରିପାରିଛି । ଦଳ ପକ୍ଷରୁ ଓପନିଂ କରିବାକୁ ଆସିଥିଲେ ଯଶସ୍ୱୀ ଜୟସ୍ୱାଲ ଓ ଅଭିଜ୍ଞ କେ.ଏଲ.ରାହୁଲ ।

ଯୟସ୍ୱାଲ ମାତ୍ର ୨୪ ରନ କରି ମହମ୍ମଦ ସଲିମଙ୍କ ବୋଲିଂରେ ୱିକେଟ ରକ୍ଷକ ଅଫସର ଜଜାଇଙ୍କୁ କ୍ୟାଚ ଦେଇ ପ୍ୟାଭିଲୟିନ ଫେରିଯାଇଥିଲେ ।

ତେବେ ଗୋଟିଏ ପଟେ କେ.ଏଲ.ରାହୁଲ ଧୈର୍ଯ୍ୟର ସହିତ ଆଫଗାନୀ ବୋଲରଙ୍କୁ ସାମ୍ନା କରୁଥିଲେ । ତାଙ୍କୁ ଆରପଟୁ ନିକଟ ଆଇପିଏଲରେ ଚମକ୍ରାର ପ୍ରଦର୍ଶନ କରିଥିବା ସାଇ ସୁଦର୍ଶନ ମଧ୍ୟ ସହଯୋଗ କରିଥିଲେ ।

ସାଇ ସୁଦର୍ଶନ ୧୦୪ଟି ବଲ ଖେଳି ୧୩ଟି ଚୌକା ସହାୟତାରେ ୮୧ ରନ କରି ମହମ୍ମଦ ସଲିମଙ୍କ ଦ୍ୱିତୀୟ ଶିକାର ହୋଇଥିଲେ ।

ତେବେ ଖବର ଲେଖା ହେବା ପର୍ଯ୍ୟନ୍ତ କେ.ଏଲ.ରାହୁଲ ୧୦୦ ରନ କରିଥିବାବେଳେ ତାଙ୍କୁ ସହଯୋଗ ଦେଇଆସୁଥିଲେ ଅଧିନାୟକ ଶୁଭମନ ଗିଲ ।

ଗିଲ୍ ୩୯ ରନ କରି ଅପରାଜିତ ଥିଲେ ।

ଏହି ଟେଷ୍ଟରେ ଅଲରାଉଣ୍ଡର ମାନବ ସୁଥାର ନିଜର ପ୍ରଥମ ଅନ୍ତର୍ଜାତୀୟ ଟେଷ୍ଟ ମ୍ୟାଚ ଖେଳୁଛନ୍ତି ।